خلى الخير جواك صاحى (Yasmina Rabie/ برنامج احلى حياه 3)

بسم الله الرحمن الرحيم اهلا بيكوا معانا فى الحلقة الثالثة من برنامج " أحلى حياة " واللى تعتبر الحلقة التانية ليا معلشوا انها طويلة شوية بس جميلة والله بداية كدة عاوزة أسألك سؤال .. ياترى جربت تساعد حد قبل كدة ؟ أنا عارفة أن معظم الناس هتقول أه ويمكن كلهم كمان بس السؤال الأهم بقى إنت مبسوط إنك ساعدتهم ؟ هنا بقى ناس كتير هتقول بالعكس أنا نادم اوى على حاجات كتير عملتها عشانهم وساعدتهم بيها لأنهم مقدروش أى حاجة عملتها عشان خاطرهم ومن الآخر مطمرش فيهم وده مزعلنى اوى طب معلش سؤال تانى .. هو إنت بتساعدهم ليه ؟ ناس كتيرة هتقول يمكن عشان بحبهم أو يمكن عشان يشكرونى أو يمكن مش عارف ليه وهى دى مشكلتك .. بس متقلقش أنا هساعدك إن شاء الله إنت تعرف إن مساعدة الناس دى بتبقى بالنوايا وأهم شرط لقبولها هو إنها تبقى خالصة لوجه الله تعالى وبتبتغى بيها رضاه قبل أى حاجة تانية .. وممكن كمان تكون نيتك إنى أسعد الإنسان ده أو ... إلخ بس اهم حاجة اوعى تكون نيتك مصلحة شخصية زى إن عشان الناس تشكرنى مثلا او انى ابقى مشهور لأن كدة يمكن ربنا يكافأك فى الدنيا بس ويضيع عليك مكافأة الآخرة فيه ناس برده هتقول طب ما انا ممكن اخلص النية لله وابقى عاوز اساعدهم بجد وهما برده ميقدروش ده وافضل انا زعلان وانا ميهونش عليا اسيبك زعلان عشان كدة هقولك على شوية حاجات وبعدها قرر بقى إذا كنت هتزعل ولا لأ إن تعرف إن الإنسان اللى بيساعد الناس ويقف جنبهم ويعطف على الفقير بيبقى غالى عند ربنا اوى اوى لدرجة ان ربنا قال فى كتابه العزيز :- " وَأَحْسِنُوا إِنَّ اللَّهَ يُحِبُّ الْمُحْسِنِينَ " وكمان فيه رجل ذهب إلى رسول الله يسأله عن أحب الأعمال إلى الله فقال الرسول " أحبُّ الناسِ إلى اللهِ عزَّ وجلَّ أنفعُهم للناسِ وأحبُّ الأعمالِ إلى اللهِ سرورٌ تدخِلُهُ على مسلِمٍ أو تكْشِفُ عنه كُرْبَةً أو تَقْضِي عنه ديْنًا أوْ تطردُ عنه جوعًا ولَأَنْ أمْشِيَ معَ أخٍ لي في حاجَةٍ أحبُّ إلِيَّ مِنْ أنْ أعتكِفَ في هذا المسجِدِ شهْرًا في مسجدِ المدينَةِ ومن كفَّ غضبَهُ سترَ اللهُ عورتَهُ ومن كظم غضَبَهُ ولو شاء أن يُمْضِيَهُ أمضاه ملأَ اللهُ قلْبَهُ رخاءً يومَ القيامَةِ ومن مشى معَ أخيه في حاجةٍ حتى تَتَهَيَّأَ له ثبَّتَ اللهُ قدمَهُ يومَ تزولُ الأقدامُ " عاوز ايه أكتر من حب ربنا وكل النعم اللى هتلاقيها فى مقابل حسنة ولو كانت صغيرة اوى يعنى انت بإحسانك للفقير والمحتاج ومساعدة الناس وإسعادهم ولو بسؤال او ابتسامة او مجرد احسان لحيوان هتكون غالى اوى عند ربنا انت نسيت ان رجل دخل الجنة ف كلب سقاه وفيه حديث جميل أوى بيقول " أن امرأة بغياً رأت كلباً في يوم حار يطيف ببئر قد أدلع لسانه من العطش فنزعت له بموقها فغفر لها. " #امرأة بغى : أى امرأة زانية. انت متخيل فضل الاحسان لحيوان .. شوف بقى كمان لو كان انسان متزعلش لما تلاقى ان فيه ناس دايما تقف جنبهم وتساعدهم ومتتأخرش عنهم ابدا وهما ميقدروش كل ده ويكونوا بتوع مصلحتهم وناكرين للجميل واوعى تندم على اى خير عملته.. افتكر مكانتك عند ربنا وان ازاى انت فرحت قلب إنسان حتى لو هو مقدرش ده وصدقنى والله وقتها هتحس بلذة العطاء الحقيقية وهتبقى مبسوط اوى إنك بتقدر تفيد الناس وتساعدهم وكمان الأهم إن ربنا بيحبك ومش ممكن يسيبك أبدا وهيعوضك بالخير دايما فى الدنيا والآخرة وخد المعلومة دى كمان .. كتر مساعدتك للناس بيخفف من توتر أعصابك لأنه بيخليك تفكر أقل فى المشاكل وبيريح نفسيتك يارب تكون حلقة النهاردة كمان عجبتكوا ودا لينك تحميل الاغنية بصيغة mp3 http://www.rr1r.net/download12543.html